ഒടിടി റിലീസിന് ശേഷം ഏറ്റവും കൂടുതൽ ആഘോഷിക്കപ്പെടുന്ന ചിത്രമായിരിക്കും ഇത്; ബാലയ്യ ചിത്രത്തെക്കുറിച്ച് തമൻ

നന്ദമുരി ബാലകൃഷ്ണ നായകനായി എത്തുന്ന ആക്ഷൻ ത്രില്ലർ ചിത്രമാണ് 'ഡാക്കു മഹാരാജ്'. ബോബി കൊല്ലി സംവിധാനം ചെയ്ത ചിത്രത്തിന് മികച്ച പ്രതികരണമായിരുന്നു പ്രേക്ഷകരിൽ നിന്നും ലഭിച്ചത്. ബോക്സ് ഓഫീസിലും മുന്നേറ്റമുണ്ടാക്കാം സിനിമയ്ക്ക് സാധിച്ചിരുന്നു. 156 കോടി രൂപയാണ് ചിത്രം വാരിക്കൂട്ടിയത്. തുടർച്ചയായി 100 കോടി ക്ലബ്ബിൽ എത്തുന്ന ബാലകൃഷ്ണയുടെ നാലാമത്തെ സിനിമയാണ് ഡാക്കു മഹാരാജ്. ഇപ്പോഴിതാ ചിത്രത്തെക്കുറിച്ച് സംഗീത സംവിധായകൻ തമൻ്റെ ട്വീറ്റ് ആണ് സോഷ്യൽ മീഡിയയിൽ ചർച്ചയാകുന്നത്. വാരിസ്, അഖണ്ഡ, ഗുണ്ടൂർ കാരം തുടങ്ങിയ സിനിമകളുടെ സംഗീത സംവിധായകനാണ് തമൻ.

ചിത്രം ഉടൻ നെറ്റ്ഫ്ലിക്സിലൂടെ സ്ട്രീമിങ് ആരംഭിക്കും. ഒടിടിയിൽ എത്തിയാൽ ഏറ്റവും കൂടുതൽ ആഘോഷിക്കപ്പെടുന്ന ചിത്രമായിരിക്കും ഡാക്കു മഹാരാജ് എന്നാണ് തമൻ ട്വീറ്റ് ചെയ്തിരിക്കുന്നത്. ചിത്രം ഡോൾബി ഔട്ട്പുട്ടിലാണ് നെറ്റ്ഫ്ലിക്സിൽ റിലീസ് ചെയ്യാൻ ഒരുങ്ങുന്നതെന്നും തൃപ്തികരമായ ഒരു അനുഭവമായിരിക്കും ഈ സിനിമയെന്നും തമൻ കൂട്ടിച്ചേർത്തു. ഡാക്കു മഹാരാജിലെ സീൻ പോസ്റ്റ് ചെയ്തുകൊണ്ട് ഒരു ആരാധകൻ സിനിമയെ പ്രശംസിച്ചിരുന്നു. ഇത് റീപോസ്റ്റ് ചെയ്തുകൊണ്ടായിരുന്നു തമന്റെ പ്രതികരണം.

പ്രഗ്യ ജെയ്സ്വാള്‍, ശ്രദ്ധ ശ്രീനാഥ്, ചാന്ദിനി ചൗധരി, റിഷി, നിതിൻ മേഹ്‍ത, ആടുകളം നരേൻ, ഷൈൻ ടോം ചാക്കോ, രവി കിഷൻ, സച്ചിൻ ഖേദേകര്‍, വിവിവി ഗണേഷ് എന്നിവരാണ് ചിത്രത്തിൽ മറ്റ്‌ പ്രധാന വേഷത്തിൽ എത്തുന്നത്. ചിത്രത്തിലെ ബാലകൃഷ്ണയും ഉർവശി റൗട്ടേലയും ഉള്ള ഒരു ഗാനരംഗം ഏറെ വിവാദങ്ങൾ സൃഷ്ടിച്ചിരുന്നു. ഗാനത്തിന്റെ കൊറിയോഗ്രഫിയെ ചൂണ്ടികാണിച്ചായിരുന്നു വിമർശനം. കെ.ചക്രവർത്തി റെഡ്ഡി, ഹരി മോഹന കൃഷ്ണ, വിനീത് പോട്ലൂരി എന്നിവരാണ് സിനിമയുടെ തിരക്കഥ ഒരുക്കിയത്. വിജയ് കാര്‍ത്തിക് കണ്ണനാണ് ഛായാഗ്രാഹണം നിർവഹിച്ചത്. അഖണ്ഡ, ഭഗവന്ത് കേസരി, വീര സിംഹ റെഡ്‌ഡി എന്നീ സിനിമകൾക്ക് ശേഷം തുടർച്ചയായി 100 കോടി ക്ലബ്ബിലെത്തുന്ന ബാലയ്യ ചിത്രമാണ് ഡാക്കു മഹാരാജ്.

Content Highlights: Daakku Maharaj will be the Most Celebrated Film after OTT release says Thaman